أطلق خالد الغندور، لاعب الزمالك السابق، رسائل غير متوقعة لأحمد شوبير، نجم الأهلي السابق، في ظل الجدل القائم بينهما حول صفقة انتقال وسام أبوعلي، مهاجم الأهلي، إلى كولومبوس الأمريكي، خلال فترة الانتقالات الصيفية الحالية.
وكان شوبير قد صرح في برنامج تلفزيوني عبر فضائية «الأهلي»، قائلاً: «واحد طالع يقول عرفونا وسام أبوعلي اتباع بكام، انت مالك؟ انت مال سعادتك؟ النادي الأهلي أدرى بحاله، وعارف هو بيعمل إيه، وده اللي مخليه ناجح وواخد أربعة أفريقيا من آخر ستة بطولات»
جاء ذلك بعد أن كتب الغندور عبر صفحته على «فيسبوك»: «يجب على النادي الأهلي الإعلان الرسمي عن ثمن بيع وسام أبوعلي، واللي هيتم وضعه في الميزانية»
وأضاف: «وعن المبلغ اللي هيحصل عليه ناديه السابق من الصفقة، بعيدًا عن الكلام المرسل على مواقع التواصل الاجتماعي، وكل واحد بيضرب الرقم اللي يعجبه»
ورد الغندور على شوبير، في فيديو نشره على صفحته الرسمية على «فيسبوك»: «حد قالي أحد الإعلاميين الكبار علق على كلامك وبيهاجمك وبيقولك انت مالك، علشان تصريحاتي عن صفقة وسام أبوعلي للنادي الأمريكي، الصراحة استغربت خصوصًا إنه إعلامي كبير والإعلامي الكبير لازم يدعم الصح»
وتابع: «في أي دولة في العالم يتم الإعلان عن قيم انتقالات اللاعبين، زي مرموش وصلاح ومبابي وغيرهم»، مضيفًا: «وسام أبوعلي فاضل لسة 4 سنين في عقده، ولوى دراع النادي ومراحش التمرين ومحضرش الجلسات ومسافرش المعسكر، والأهلي قال وسام مش للبيع، بنبص لقينا هيتباع لأمريكا اللي أقل سعر مقارنة بالريان والوصل، إيه المشكلة لو الأهلي يعلن عن تفاصيل الصفقة؟»
استكمل: «هل ده حاجة عيب؟ هل دي حاجة غلط؟ هل الفلوس دي مش هتخش ميزانية النادي؟ وأنا مش فاهم اللي بيخبي بيخبي ليه؟ واللي بيدافع عن الغلط بيدافع ليه؟»
وأضاف: «مش ده مال عام؟ مش دي شفافية؟ واللي بيقول انت مالك! أنا إعلامي في قناة عامة وراديو عام وبتكلم على كل الأندية، وانتقدت أحمد فتوح بل طالبت ببعيه مع إنه بيلعب في نادي أنا كنت كابتنه»
وأكد: «هذا الإعلامي اللي بيقول انت مالك هو هو اللي 90% من كلامه بيكون عن الزمالك وعن النادي المنافس ومشاكله وفلوسه بيجيبها منين، وكل ده في قناة فئوية، وكل اللي في القناة بيتكلموا عن الزمالك والمفروض يتكلموا عن ناديهم»
وأشار: «انت زعلان أوي وأنا بتكلم في قناة عامة، وتيجي تقولي انت مالك ملكش دعوة؟ والله عيب، انتوا أكبر من كدة، وعيب تكون بتدافع عن غلط وبتهاجم اللي بيتكلم في الصح»
وعلق الغندور على الفيديو، من خلال صفحته الرسمية: «مرة أخيرة، أنا أتكلم فيما يعنيني كإعلامي ولا أهاجم أي إعلامي ولا أحجر على رأي أي شخص، كل واحد حر طالما بيقول الحق والصح، ولكن للأسف البعض بيهاجم الصح لغرض في نفسه لا يعلمه إلا الله المطلع على النوايا، وفي النهاية، أي حد بيشتم أو بيتطاول على شخصي، أتمنى له الهداية والأخلاق الحميدة، عشان عمري ما هعرف أرد بقلة أدب ولا لسان متدني»