هاجم سيد معوض، نجم الأهلي السابق، أحمد فتوح، لاعب الفريق الأول لكرة القدم بنادي الزمالك، بسبب تصرفه الأخير في حفل الساحل، حيث قرر جون إدوارد، المدير الرياضي لنادي الزمالك، بالتعاون مع عبدالناصر محمد، مدير الكرة، فرض غرامة مالية على فتوح بقيمة مليون جنيه، بالإضافة إلى إيقاف مستحقاته وتحويله للتحقيق بعد مغادرته معسكر الفريق لحضور حفل في الساحل الشمالي دون إذن.
وفي تصريحات تليفزيونية خلال برنامج «اللعيب» المذاع على شاشة «إم بي سي مصر»، قال سيد معوض: «عندي مشكلة مع فتوح نفسه في الدماغ، ربنا مديك نعمة كبيرة جدًا لازم نحافظ عليها، هو مُصر على ضياعها ومُصر على الافتراء».
وأضاف: «في كام باك ليفت في مصر هو لوحده، بقاله سنتين فين من وقت ما كان مع كارلوس كيروش في كأس الأمم، كل أخباره مشاكل وحبس، هل شوفته في الملعب؟!».
وتابع نجم الأهلي السابق: «لما يحصل موقف زي اللي حصل في الساحل وحد يتوفي رب أسرة، لازم تأخذ بالك من نفسك شوية، الناس بتتكلم عن المعسكر، الراجل السنة اللي فاتت معسكر إيه، الراجل عامل جناية السنة اللي فاتت».
وأكمل: «لازم يهدي عشان ربنا يسترها عليه، لعيب دولي كل سنتين بيعمل ماتش ويرجع على المنتخب عشان مفيش حد غيره، ولو في غيره كان مش هيرجع أصلاً، والكورة مش بتقف على حد».